*बा...,*

*बा...,*

लोक म्हणायचीत
बा ला दारुडा
सडला लिव्हर अन् मेला
पर त्याच त्यालाच
दुःख माहीत
का पीत होता तो एवढा

बा च
कामच होतं असं
गटारातलं मैल काढायचं
तुम्हीच सांगा
माझ्या बा नं
कसं
न पिता काम करायचं

पोटाच्या त्या
खळगी पाई
दिसरात
कामात जुपायचा
शरीराचं दुःखनं
घालवाया
त्यो कायम
नशेत आसायचा

पण
खरं सांगतो तुम्हाला
माझा बा
लय मोठ्या दिलाचा
कितीबी रोज पिला
तरी
न विसरता
खायला आणायचा

लोक म्हणायचीत
जरी बा दारुडा
तरी कष्टानं घर
त्यानं उभारलं
पर
आमचं सुख बघायला
त्याला आयुष्य कमी पुरलं
पर
आमचं सुख बघायला
त्याला आयुष्य कमी पुरलं.!

*✍रवींद्र कांबळे 9112143360*